डंपरमध्ये धोकादायक दगड वाहतूक

लोणीकंद टाईम्स प्रतिनिधी

भावडी–लोणीकंद परिसरात सध्या मोठ्या प्रमाणात दगडखाणी, क्रशर व गौण खनिज व्यवसाय सुरू असून, यामुळे क्रशरमधून निघणारा क्रशंड, खडी, दगडाची वाळू आदी खनिज मालाची मोठ्या संख्येने डंपरद्वारे वाहतूक केली जाते. मात्र या वाहतुकीचा सर्वाधिक फटका सामान्य नागरिकांना बसत असून रस्त्यावरून धावणारे हे अवजड डंपर अक्षरशः जीवघेणे ठरत आहेत.

स्थानिकांच्या मते, डंपरमध्ये प्रमाणापेक्षा जास्त खनिज भरले जाणे, चालकांचा अतिवेग, तसेच पोलीस व प्रशासनाकडून होणारे उघड दुर्लक्ष यामुळे परिस्थिती दिवसेंदिवस गंभीर होत आहे. रस्त्यावरून उडणारी दगडांची धूळ, सर्रास उघडे पडणारे दगड आणि बेफिकीरपणे धावणारे डंपर यामुळे नागरिकांच्या सुरक्षेवर सतत गदा येत आहे.

“हा जीवाशी चाललेला खेळ नेमका कधी थांबणार?” असा संतप्त सवाल नागरिकांकडून उपस्थित केला जात असून, या धोकादायक वाहतुकीवर तातडीने निर्बंध आणावेत, नियमित तपासणी मोहीम राबवावी आणि अतिवजनी डंपरवर कठोर कारवाई करावी, अशी मागणी जोर धरत आहे.

प्रशासनाने याकडे गांभीर्याने लक्ष देत तातडीची पावले उचलली नाहीत, तर कोणत्याही क्षणी मोठा अपघात घडू शकतो, अशी भीतीही स्थानिकांनी व्यक्त केली आहे.