कारच्या धडकेत ८ वर्षीय चिमुरडीचा मृत्यू; चालकावर गुन्हा दाखल

पार्किंगमध्ये झोपलेल्या ८ वर्षीय चिमुरडीच्या डोक्यावर कारचे चाक गेल्याने तिचा दुर्दैवी मृत्यू झाल्याची घटना शुक्रवार (दि. ३ एप्रिल २०२६) रोजी दुपारी सुमारे साडेबारा वाजण्याच्या सुमारास रामनगर, वढू खुर्द येथे घडली असून मैराबी रसुलसाब बळीगर (वय ८) असे मृत्यू झालेल्या मुलीचे नाव आहे. याप्रकरणी लोणीकंद पोलीस ठाण्यात चालकावर गुन्हा दाखल करण्यात आला आहे.

लोणीकंद पोलिसांनी दिलेल्या माहितीनुसार, चालक भरत रमेश नेहेते (वय ४६, रा. रामनगर वढू खुर्द) हा त्याच्या ताब्यातील MH-12-NE-6427 क्रमांकाची Mahindra XUV500 ही कार निष्काळजीपणे चालवत होता. यावेळी पार्किंगमध्ये झोपलेल्या मैराबीच्या डोक्यावरून कारचे चाक गेल्याने ती गंभीर जखमी झाली. जखमी अवस्थेत तिला तातडीने रुग्णालयात दाखल करण्यात आले; मात्र उपचारादरम्यान तिचा मृत्यू झाला.

या प्रकरणी लालासाब महंमदसाब कालेगार (वय ३९, रा. सोमेश्वर पार्क, लोणीकंद) यांनी दिलेल्या फिर्यादीवरून लोणीकंद पोलीस ठाण्यात चालक भरत रमेश नेहेते याच्याविरुद्ध गुन्हा दाखल करण्यात आला आहे. या घटनेचा पुढील तपास सहाय्यक पोलीस निरीक्षक निलेश घोरपडे करीत आहेत.