सुवर्णा डफळ यांचा कॉम्प्युटर सायन्स प्रशिक्षणात द्वितीय क्रमांक

लोणीकंद प्रतिनिधी :

जिल्हा परिषद शाळा, लोणीकंद येथील शिक्षिका सुवर्णा संतोष डफळ यांनी कॉम्प्युटर सायन्स प्रशिक्षणात पुणे जिल्ह्यात द्वितीय क्रमांक पटकावत उल्लेखनीय यश संपादन केले. त्यांच्या या यशाबद्दल आयोजित गौरव सोहळा मुख्य कार्यकारी अधिकारी गजानन पाटील, शिक्षणाधिकारी संजय नाईक, उपशिक्षणाधिकारी आस्मा मोमीन व वाघमारे यांच्या हस्ते पार पडला.

जिल्हा परिषद शिक्षण विभाग, पुणे यांच्या माध्यमातून ऍमेझॉन व लीडरशिप फॉर इकती यांच्या संयुक्त विद्यमाने “कॉम्प्युटर सायन्स टिचिंग एक्सलन्स” हा उपक्रम राबविण्यात आला. या अंतर्गत शिक्षकांसाठी स्क्रॅच कोडींगमधील लिस्ट, व्हेरिएबल, ऑपरेटर, कंडिशनल अशा संकल्पनांवर आधारित ४५ दिवसांचा ऑनलाईन प्रशिक्षण कोर्स आयोजित करण्यात आला होता..

या प्रशिक्षणासाठी जिल्ह्यातील एकूण १०७६ शिक्षकांनी नोंदणी केली होती. त्यापैकी १७६ शिक्षकांनी हा कोर्स यशस्वीरित्या पूर्ण केला. कोर्समध्ये उत्कृष्ट प्राविण्य मिळवणाऱ्या शिक्षकांचा सन्मान डिजिटल साहित्य व प्रमाणपत्र देऊन करण्यात आला.

या उपक्रमात लोणीकंद जिल्हा परिषद शाळेच्या शिक्षिका सुवर्णा संतोष डफळ यांनी उल्लेखनीय कामगिरी करत पुणे जिल्ह्यात द्वितीय क्रमांक पटकावला.सुवर्णा डफळ यांना हवेली तालुक्याचे गटशिक्षणाधिकारी हेमंतकुमार खाडे, विस्ताराधिकारी शंकर मुंढे, केंद्रप्रमुख शांता इचके तसेच मुख्याध्यापक एकनाथ शिंदे यांचे मार्गदर्शन लाभले.

दरम्यान, त्यांच्या या यशाबद्दल माजी जिल्हा परिषद अध्यक्ष प्रदीप कंद, पंचायत समिती सदस्या मोनिका कंद, शाळा व्यवस्थापन समिती, ग्रामस्थ, पालक व शिक्षकांच्या वतीने अभिनंदन करण्यात आले.