ट्रेलरची विद्युत खांबांना धडक; परिसराचा वीजपुरवठा खंडित

लोणीकंद, प्रतिनिधी : लोणीकंद येथील केसनंद रोडवरील राजेश सोसायटीसमोर सोमवारी (दि. ८) पहाटे साडेपाचच्या सुमारास ट्रेलरने विद्युत वाहिनीच्या डबल पोल स्ट्रक्चरला धडक दिल्याने परिसरातील वीजपुरवठा खंडित झाला.

मिळालेल्या माहितीनुसार, (MH 14 KA 2129) क्रमांकाचा ट्रेलर उताराच्या रस्त्यावरून जात असताना चालकाचे वाहनावरील नियंत्रण सुटले. त्यामुळे ट्रेलर थेट विद्युत वाहिनीच्या खांबांवर जाऊन आदळला. या धडकेत डबल पोल स्ट्रक्चर, विद्युत खांब तसेच परिसरातील काही वस्तूंचे मोठे नुकसान झाले.

अपघातानंतर सुरक्षिततेच्या दृष्टीने संबंधित भागातील वीजपुरवठा तात्काळ बंद करण्यात आला. घटनेची माहिती मिळताच महावितरणचे कर्मचारी व लाईनमन घटनास्थळी दाखल झाले. नुकसानग्रस्त विद्युत यंत्रणेच्या दुरुस्तीचे काम पूर्ण होईपर्यंत वीजपुरवठा खंडित राहणार असल्याची माहिती लाईनमन यांनी दिली.

सुदैवाने या अपघातात कोणतीही जीवितहानी झाली नसली तरी विद्युत यंत्रणेचे मोठे नुकसान झाल्याने परिसरातील नागरिकांना वीजपुरवठा खंडित होण्याचा फटका बसला आहे.