लोणीकंदमध्ये भरधाव दुचाकीच्या धडकेत ज्येष्ठ नागरिकाचा मृत्यू

लोणीकंद येथील म्हसोबा मंदिराजवळ पुणे-अहिल्यानगर रोडवर अज्ञात दुचाकीस्वाराच्या धडकेत एका ज्येष्ठ नागरिकाचा मृत्यू झाल्याची घटना घडली आहे. याप्रकरणी लोणीकंद पोलीस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, ही घटना १९ जून २०२६ रोजी रात्री सुमारे ९ वाजण्याच्या सुमारास म्हसोबा मंदिराजवळ घडली. अज्ञात दुचाकीस्वाराने वाहतुकीच्या नियमांकडे दुर्लक्ष करून भरधाव व निष्काळजीपणे वाहन चालवत रस्त्याने पायी जात असलेल्या राधाकिसन मंजीबा घाडगे (वय ६४, रा. काकावाडी, महाराष्ट्र बँकेमागे, लोणीकंद) यांना जोरदार धडक दिली.

या अपघातात राधाकिसन घाडगे गंभीर जखमी झाले. उपचारादरम्यान त्यांचा मृत्यू झाला. याबाबत त्यांचे पुत्र आंबादास घाडगे (वय ४०, रा. लोणीकंद) यांनी फिर्याद दिली आहे.

या प्रकरणी लोणीकंद पोलीस ठाण्यात गुन्हा क्रमांक २८१/२०२६ दाखल करण्यात आला असून भारतीय न्याय संहिता कलम २८१, १०६(१) तसेच मोटार वाहन कायदा कलम १८४ व ११९/१७७ अन्वये अज्ञात दुचाकीस्वाराविरुद्ध गुन्हा नोंद करण्यात आला आहे.सहाय्यक पोलीस निरीक्षक आर. ए. कदम यांच्या मार्गदर्शनाखाली पुढील तपास सुरू आहे.