गुढीपाडव्याच्या मुहूर्तावर स्वरदा बापट यांच्या जनसंपर्क कार्यालयाचे उद्घाटन

पुणे : दिवंगत माजी खासदार गिरीश बापट यांच्या सून स्वरदा गौरव बापट यांच्या जनसंपर्क कार्यालयाचे उद्घाटन गुढीपाडवा या शुभमुहूर्तावर उत्साहात पार पडले.

या नव्या उपक्रमाचे विविध स्तरांतून स्वागत होत असून, उद्घाटन प्रसंगी भारतीय जनता पक्षाचे पुणे जिल्हा सरचिटणीस अमित सोनवणे यांनी स्वरदा बापट यांना त्यांच्या पुढील राजकीय व सामाजिक वाटचालीस शुभेच्छा दिल्या. तसेच यावेळी अनेक मान्यवर, कार्यकर्ते व नागरिकांचीही उपस्थिती होती.

या कार्यालयाच्या माध्यमातून सर्वसामान्य नागरिकांपर्यंत थेट पोहोचून त्यांच्या समस्या जाणून घेणे आणि त्यांचे तातडीने निराकरण करणे हा मुख्य उद्देश असल्याचे स्वरदा बापट यांनी सांगितले.

गिरीश बापट यांच्या कार्यपद्धतीचा आदर्श डोळ्यासमोर ठेवत, समाजातील गरजू, वंचित व गोरगरीब घटकांना आधार देत निस्वार्थीपणे समाजसेवा करण्याचा निर्धार त्यांनी व्यक्त केला. या उपक्रमामुळे अधिकाधिक लोकांपर्यंत मदतीचा हात पोहोचेल, असा विश्वासही त्यांनी व्यक्त केला.

या नव्या उपक्रमामुळे स्वरदा बापट यांच्या पुढील राजकीय व सामाजिक वाटचालीस शुभेच्छांचा वर्षाव होत आहे..