लोणीकंदमध्ये स्वातंत्र्यदिन उत्साहात; विविध ठिकाणी राष्ट्रध्वजास मानवंदना

लोणीकंद : भारताचा ८०वा स्वातंत्र्यदिन लोणीकंद (ता. हवेली) परिसरात उत्साहात आणि देशभक्तीमय वातावरणात साजरा करण्यात आला. जिल्हा परिषद शाळा, लोणीकंद पोलीस ठाणे, ग्रामपंचायत कार्यालय तसेच सिद्धार्थनगर व सहकारनगर येथे राष्ट्रध्वज फडकावून तिरंग्याला मानवंदना देण्यात आली.

लोणीकंद येथील जिल्हा परिषद शाळेत पुणे जिल्हा परिषदेचे माजी अध्यक्ष प्रदीप कंद यांच्या उपस्थितीत पंचायत समिती सदस्या मोनिका कंद व सरपंच सुप्रिया कंद यांच्या हस्ते ध्वजारोहण करण्यात आले. शालेय समितीचे अध्यक्ष विजय कंद व उपाध्यक्ष गोपीनाथ कंद यांच्या हस्ते राष्ट्रध्वजपूजन करण्यात आले.

लोणीकंद पोलीस ठाण्यात वरिष्ठ पोलीस निरीक्षक सुनीता रोकडे यांच्या हस्ते ध्वजारोहण करण्यात आले. ग्रामपंचायत कार्यालयात सरपंच सुप्रिया कंद व उपसरपंच सागर कंद यांच्या हस्ते ध्वजारोहण, तर माजी ग्रामपंचायत सदस्य राहूल शिंदे यांच्या हस्ते राष्ट्रध्वजपूजन करण्यात आले.

सिद्धार्थनगर येथे विजय गायकवाड यांच्या हस्ते ध्वजारोहण करण्यात आले. यावेळी सरपंच सुप्रिया कंद यांच्या उपस्थितीत राष्ट्रध्वजपूजन करण्यात आले. सहकारनगर येथे बंडू देवकुळे यांच्या हस्ते ध्वजारोहण, तर संजय दोरगे यांच्या हस्ते राष्ट्रध्वजपूजन करण्यात आले.

या कार्यक्रमांना सरपंच, उपसरपंच, ग्रामपंचायत सदस्य, कर्मचारी, ज्येष्ठ नागरिक, युवक-युवती तसेच मोठ्या संख्येने ग्रामस्थ उपस्थित होते. उपस्थितांनी राष्ट्रध्वजाला मानवंदना देत स्वातंत्र्यलढ्यातील हुतात्म्यांना अभिवादन केले. देशभक्तीपर घोषणांनी परिसर दुमदुमून गेला असून संपूर्ण लोणीकंद परिसरात उत्साहाचे आणि देशभक्तीचे वातावरण निर्माण झाले होते.