वाजेवाडी- मांजरेवाडीच्या उपसरपंचपदी सुरेखा मांजरे यांची बिनविरोध निवड

मांजरे घराण्याला तिसऱ्यांदा उपसरपंचपदाचा मान; ग्रामस्थांकडून अभिनंदनाचा वर्षाव

वाजेवाडी : शिरूर तालुक्यातील वाजेवाडी -मांजरेवाडी ग्रामपंचायतीच्या उपसरपंचपदी सुरेखा रमेश मांजरे यांची नुकतीच बिनविरोध निवड करण्यात आली. पुणे जिल्हा परिषदेचे माजी अध्यक्ष तथा भारतीय जनता पक्षाचे पुणे जिल्हाध्यक्ष प्रदीप विद्याधर कंद यांच्या त्या भगिनी आहेत.

उपसरपंच सुरज मधुकर तिखे यांनी राजीनामा दिल्यामुळे उपसरपंचपद रिक्त झाले होते. या रिक्त पदासाठी निवडणूक प्रक्रिया पार पडली. उपसरपंचपदासाठी सुरेखा रमेश मांजरे यांचा एकमेव अर्ज दाखल झाल्याने त्यांची बिनविरोध निवड झाल्याचे सरपंच पूनम चौधरी यांनी जाहीर केले. त्यांच्या अध्यक्षतेखाली ही निवड प्रक्रिया पार पडली. यावेळी ग्रामपंचायतीचे आजी-माजी पदाधिकारी आणि ग्रामस्थ उपस्थित होते.

मांजरे घराण्याला तिसऱ्यांदा उपसरपंचपदाचा मान

यापूर्वी काळुराम मांजरे आणि धर्मराज मांजरे यांनी उपसरपंचपद भूषविले होते, आता सुरेखा रमेश मांजरे यांच्या निवडीमुळे मांजरे घराण्याला तिसऱ्यांदा उपसरपंचपद भूषविण्याचा मान मिळाला आहे. त्यांच्या निवडीमुळे ग्रामपंचायतीच्या कारभारात त्यांच्यावर महत्त्वाची जबाबदारी सोपविण्यात आली आहे.

सुरेखा मांजरे यांच्या निवडीबद्दल लोणीकंदचे माजी उपसरपंच संजय कंद, नागेश वाळके, संपत कंद, सतीश कंद, सुरेश कंद, योगेश कंद, जय कंद, नितीन कंद, दिनेश कंद, रोहित कंद, डॉ. राकेश कंद, मनीष सातव, ज्योती मासळकर, स्वाती दरगुडे आणि शोभा कंद यांच्यासह ग्रामस्थ व मान्यवरांनी त्यांचे अभिनंदन करून पुढील वाटचालीस शुभेच्छा दिल्या.